असं वाटतं हे सारं काही असंच घडत राहावं
प्रीतीचं हे पाखरू हवेत असंच उडत राहावं
मैत्रिणींच्या घोळक्यातून लवकर तू सुटावं
बागेत ठरल्या ठिकाणी गुपचूप येउन भेटावं
उशीरा तू आलीस म्हणून आज मी रुसावं
लाडात येउन मग तू मला रेटूनच बसावं.
रोजच तू मला एक नवी कविता मागावी
ज्यासाठी मी कालची अख्खी रात्र जागावी
दहा ओळींची कविता तू उत्सुकतेने वाचावी
तेव्हाच मला आणखी एक चारोळी सुचावी
बागेतला गुलाब आत्ताच हवा, तू हट्ट करावा
काटा रुतेल या भीतीने हात माझा घट्ट धरावा
केसात तुझ्या माळताना तू अशी काही लाजावी
जणू स्वप्नातली ती राणी आज प्रत्यक्ष सजावी
खरच, असं वाटतं हे सारं काही असंच घडत राहावं
मी तुझ्या अन तू माझ्या, रोजच प्रेमात पडत राहावं
--वैभव